28.11.2024
Гостин на час: Билјана Аслимоска - специјален едукатор и рехабилитатор
Во рамките на едукативната активност за подигнување на свеста за потребите и предизвиците со кои се соочуваат слепите и слабовидните лица, во нашиот клас беше организирана работилница, која ја водеше гостин-родителот Билјана Аслимоска, специјален едукатор и рехабилитатор (дефектолог) во ООУ „Христо Узунов“ – Охрид. Целта на работилницата беше учениците да ги доживеат и разберат искуствата на слепите лица преку практични вежби и интеракција со различни сетила.
Работилницата започна со тоа што учениците имаа покриени очи, за да можеа да се потпрат само на другите сетила – слухот, допирот, мирисот и вкусот. На овој начин, учениците се обидоа да погодат различни предмети само со допир, што им помогна да го разберат ограничувањето што го доживуваат слепите лица во секојдневниот живот.
Потоа, учениците беа запознаени со Брајовото писмо, писмо кое го користат слепите лица за пишување и читање. Во оваа активност, учениците имаа можност да допрат книга напишана на Брајово писмо, што беше многу инспиративно и едукативно искуство.
Во продолжение на работилницата, беше прикажан видеоматеријал за слепо дете, кој ги прикажуваше секојдневните предизвици со кои се соочува едно слепо дете. Видео материјалот помогна да се развие длабока разбирање и емпатија за луѓето кои го имаат овој вид на инвалидитет.
На крајот од работилницата, секој ученик доби задача на лист хартија да ја напише првата буква од своето име користејќи Брајово писмо, со перфорација со молив. Ова беше интересен и корисен начин за учениците да се запознаат со овој метод на пишување. Понатаму, секој ученик ја напиша својата визија за потенцијалите кои ги поседува, користејќи техника "ѕвезда", при што се создаде можност учениците да се мотивираат и размислуваат за своите вештини и способности.
Оваа работилница беше уникатна можност за сите нас да се запознаеме со предизвиците што ги имаат слепите и слабовидните лица, како и да развиеме поголема свест и чувствителност за потребите на другите, да покажеме поголема подготвеност да помагаме и да ги разбереме различните способности на своите врсници.
Албумот можете да го погледнете тука